Hér fæddust 8 kettlingar í kvöld. Þvílíkur dugnaður í gangi hjá henni Petru okkar, en þetta er hennar fyrsta got. Fæðingarnar gengu allar mjög vel og eignaðist hún 2 fress og 6 læður.

Ef einhverjum vantar fallegan kött þá leggið inn pantanir hjá mér. Þeir verða tilbúnir til afhendingar eftir ca 6 vikur.

Afar ánægjulegur dagur hér á bæ!

Góðar stundir!

Sjallinn - kominn í kattaræktina!

Ágætu lesendur.

Þá er ég kominn úr dvala líkt og birnir að vori. Sé mig knúinn til að taka þátt í umræðu samfélagsins á síðustu og verstu tímum.

Ástand mála er vissulega afar dapurlegt, svo ekki sé meira sagt og mikið gengið á að undanförnu og útlit fyrir að staðan muni versna enn frekar.

Maður finnur til með þeim sem missa vinnuna nú á hverjum degi og er varla enn farinn að skilja þessi mál öll.

Margt hefur verið sagt og margir hafa komið inn í umræðuna. Mikil reiði er í samfélaginu og stór hópur manna er farinn í leit að sökudólgum.

Vissulega má þegar þessi mál verða skoðuð finna menn sem hafa gert mistök á einn og annan hátt. En það hjálpar okkur því miður lítið sem þjóð að ætla nú í nornaveiðar af því tagi sem maður upplifir nú orðið á hverjum degi æ sterkar. Það sem skiptir máli er að koma okkur út úr þessum stormi sem geysar. Koma okkur í betra skjól og svo þegar ráðrúm gefst að gera þessi mál upp. Þjóðin verður að treysa á ráðamenn þjóðarinnar við þessar aðstæður og treysta því að frændþjóðir okkar og aðrar þjóðir muni koma til bjargar.

Það er aðdáunarvert að fylgjast með stuðningi Færeyinga. Þar er lítil þjóð með stórt hjarta. Engin önnur þjóð mun styðja okkur jafn ríkulega og Færeyingar þegar litið er á stærð þjóðarinnar. Við Íslendingar eigum að rækta enn frekar sambandið við okkar nánustu frændur, enda sýnir sig hverjir standa með okkur þegar á reynir.

Í umræðunni undanfarið hefur mikið verið rætt um upptöku Evru og inngöngu í ESB. Ég sjálfur hef ekki breytt afstöðu minni til inngöngu í ESB. Ég trúi því að þessar kannanir sem fólk er að taka þátt í núna geti ekki byggt á raunverulegum niðurstöðu.

Auðvitað segir fólk já í örvinglan sinni nú þegar afkoma heimilanna versnar og hagsmunaaðilar kaupa svona kannanir á færibandi. Við eigum ekki að útiloka neina möguleika þegar kemur að hagsmunum þessarar þjóðar, en við eigum heldur ekki að hlaupa til í óðagoti og taka ákvarðanir sem varða börn þjóðarinnar um aldur og ævi. Hvaða rétt hafa núlifandi Íslendingar til að láta fullveldi okkar í hendur frökkum og þjóðverjum? Hvaða rétt hafa núlifandi Íslendingar til að afhenda auðlindir okkar til annarra Evrópuþjóða? Hvaða rétt hafa núlifandi Íslendingar til að fórna sjálfstæði okkar sem tók forfeður og -mæður okkar mörg hundruð ár að berjast fyrir?

Við eigum vissulega að gera samninga við önnur ríki um verslun og önnur viðskipti, en slíkir samningar mega aldrei byggjast á óeðlilegum viðskiptaskilmálum s.s. því að henda dýrmætustu eignum okkar fyrir róðra og afhenda stjórn landsins til Evrópuþingsins, nóg er víst af tilskipunum þaðan um okkar mál nú þegar. Þær tilskipanir taka oft lítið mið af sérstöðu okkar m.a. landfræðilega og varla mun það lagast mikið þó við fáum 2-3 þingmenn á Evrópuþingið í Brussel. Við verðum þar eftir sem áður eins og lítið sandkorn í fjöru.

Nú þarf þjóðin að leggja stóru ágreiningsmálin á hilluna og takast saman á við að koma okkur upp úr öldudalnum. Treysta böndin og styðja við ríkisstjórnina við nauðsynlegar aðgerðir innanlands og utan. Sýna að við erum ein þjóð í þessu landi. Við erum ekki af baki dottin. Tækifærin eru ennþá til staðar hérna, auðlindirnar hafa ekki farið neitt og þekkingin er hér enn. Það er manninum eðlislægt að finna nýjar leiðir þegar gamlar lokast. Sýnum heiminum að við getum það.

Ég á eflaust margt ósagt um þessi mál, en læt þessa hugvekjum mína duga í bili sem fyrsta blogg eftir langa bloggpásu.

Sjallinn - ekki af baki dottinn!

Sæl öll.

Ég er haldinn gríðarlegri bloggleti þessa dagana. Hef haft það ljómandi gott annars.

Við fengum okkur 2 dísarpáfagauka á fimmtudag og renndum svo á Selfoss í dag og keyptum þann þriðja. Gaman af þessum fuglum. Þetta eru 2 kerlingar og 1 karl. Hann er mun spakari syngur meira. Þær eru fælnari og heyrist lítið í þeim.

Við erum því orðin 7 hér í heimili. Auk okkar tveggja eru það kettirnir Faró og Petra & svo dísurnar Queen Dagmar, Queen Antonette og Ferdinand (Bráðabirgðanöfn )

Við keyptum bað handa dísunum í dag en þau hafa nú ekki ennþá prófað það, en vonandi kemur það. Stefnan er svo á næstum misserum að kaupa fyrir þau varpbæli. En ekki er alveg ljóst hvora kerlinguna hann Ferdinand ætlar að velja sér sem maka þó allt bendi til þess að það verði Queen Antonette.

Ég bendi lesendum á verkefnissíðu virkjana í neðri Þjórsá www.thjorsa.is þar sem eru upplýsingar um virkjanirnar, fréttir o.fl. áhugavert.

Ég er farinn að hlakka til sauðburðarins, en gemsarnir geta farið að bera upp úr 15. apríl og ærnar ættu að byrja uppúr 26. apríl. Stefnan er síðan að sauðburði verði lokið eigi síðar en 20. maí þó það sé auðvitað bara óskhyggja.

Við keyptum okkur flug til Bretlands í byrjun júní og ætlum að vera í nokkra daga. Verður gott að komast aðeins í frí, en við áttum ekki marga kosti í stöðunni. Annaðhvort var að fara strax eftir sauðburð eða seint í haust. Aldrei að vita þó nema að við förum aftur í haust í styttri ferð. Okkur langar til Kanada og eins til FInnlands, en við höfum hvorugir á hvorugan stað komið.

Læt þennan stutta og fremur innihaldslausa pistil duga.

Sjallinn - alltaf brosandi

Frábær dagur að kveldi kominn.

Fórum um hádegi í bíltúr í Hvolsvöll. Versluðum inn og fengum okkur að borða. Eftir það keyrðum við heim. Um kaffi kom Ísleifur Pálsson, vinur minn, í heimsókn og eftir stutta kaffidrykkju fórum við út í hesthús og fórum á hestbak. Ég fór á Þráð og Ísleifur á Leik. Riðum út að stóðhestastöð og þaðan niður á veg og svo heim tröðina að Gunnarsholti og heim að Akurhóli. Veðrið var frábært og reiðtúrinn frábær. Tók Ísleifur þessa mynd af mér og Þræði:

Eftir að við komum heim í hesthús mokaði ég út tvær stíur og Leifi hjálpaði mér að setja múl á hana Þernu (folaldið) og gekk það bara nokkuð vel. Tók hann þessa mynd af okkur saman:



Á meðan ég mokaði út beislaði Leifi Kóng, lagði á hann og gerði teymisæfingar á honum. Að því loknu settist hann á bak inni í húsi og fór svo með hann út í gerði þar sem hann settist aftur á bak. Gekk það ótrúlega vel, þó Kóngur hafi ekki alveg verið alltaf með á nótum, enda bara búinn að fá mánaðartamningu. Verður gaman að halda tamningunum áfram, enda lærir hann vel og er strax farinn að treysta á manninn.

Eftir að hafa gefið keyrði ég Ísleif aftur niður í Gunnarsholt þar sem hann geymdi bílinn, enda bara jeppafæri síðustu 800 metrana hingað. Fór ég þá niður á Heiðarbrún og gaf fénu. Kom við í Olís og Kjarval og keyrði heim. Jón Árni var að undirbúa matinn sem var dýrindis folaldasteik. Grillaði ég kjötið, en Jón Árni sá um rest. Eftir frábæra kvöldmáltíð vaskaði ég upp, rakaði mig og horfði á sjónvarp þangað til ég fékk í mig bloggþörfina og sit nú við það að upplýsa alheiminn um mitt persónulega daglega líf

Á morgun ætla ég m.a. að taka hana Djásn á hús, en hún er 4ja vetra gömul undan 1. verðlauna hestinum Hugari frá Hvítárholti og Þrumu frá Ekru. Fer hún í tamningu í lok vikunnar. Ætla einnig á hestbak og mun halda áfram að vinna í Þernu og Kóngi.

Svo þarf ég helst að vinna eitthvað líka, en þar sem það er sunnudagur er óvíst að ég geri það, mun koma í ljós

Næsta vika er orðin vel skipulögð. Mánudagur og þriðjudagur fara í vinnu mest í Reykjavík. Miðvikudagur er fæðingardagur minn og því er reynt að gera sem minnst annað en að vinna þó fyrri part dagsins hér heima. Fimmtudagur fer í vinnu fram að hádegi og í rúning á fénu eftir hádegi. Föstudagur fer í vinnu og í að sinna fé og hrossum. Svo merkilegt sem það kann að hljóma þá er næsta vika fyrsta vikan í afar langan tíma sem ekki er neinn fyrirfram ákveðinn/skipulagður fundur á vegum sveitarfélagsins og ætla ég að njóta þess aðeins, enda á ég það skilið

Þessi mynd var tekin af mér á Holtablóti um síðustu helgi í góðum félagsskap:

f.v. Berglind í Skarði, Erlendur í Skarði, Rúnar frá Svínhaga, Sævar í Snjallsteinshöfða og undirritaður. Olgeir Engilbertsson tók myndina.

Læt þetta duga að sinni. Elskið þið friðinn og .... you know what

Sjallinn - ánægður með dagsverkið!

Gott fólk.

Í dag er hlaupársdagur og því nauðsynlegt að blogga, þó ekki sé nema í tilefni af því, enda fær maður ekki tækifæri aftur til þess fyrr en að fjórum árum liðnum.

Ýmislegt gerst í vikunni. Villi borgarfulltrúi steig undan feldinum og tilkynnti að hann ætlaði ekki fet. Sagði þó ekki ljóst hver yrði borgarstjóri í mars 2009. Ég hefði talið farsælla að flokksfélagar mínir í borginni hefði ákveðið og gefið út hver yrði borgarstjóri þannig að þeirri óvissu væri eytt. Er hinsvegar mjög glaður með að flokkurinn mælist með 40% fylgi og skv. því myndi hann bæta við sig 2 þingmönnum, væri kosið nú. Jafnframt hefur formaður flokksins mest persónufylgi íslenskra stjórnmálamanna sem verður að teljast glæsilegt og þá er ekki síður gott að ríkisstjórnin hefur stuðning 7 af hverjum 10 Íslendingum. Slíkt verður að teljast afar gott, enda er mjög stór meirihluti fylgjandi ríkisstjórninni sem er hollt og gott fyrir þetta þjóðfélag. Hefur líklega ekki mælst svona mikill stuðningur í áraraðir og þingstyrkur meirihlutans hefur ekki verið svona öflugur í áratugi.

Ég veiktist heiftarlega í vikunni. Lagðist í flensu á miðvikudag og lagðist í orðsins fyllstu merkingu því ég var ekki fær til að fara framúr og sækja vatnsglas, hvað þá meira. Lá og svitnaði allan daginn og alla nóttina. Var orðinn sæmilega rólfær á fimmtudagsmorgun, en áfram með hita. Í dag var ástandið orðið mun betra, ég orðinn hitalaus þó ennþá sé ég ekki orðinn fullfrískur.

Ákvað nú síðdegis að fara á hestbak. Lagði á Leik og tók Þráð með í taumi. Reið upp Heklubraut og fór ca kílómetur upp fyrir Þórðarlund. Þegar ég snéri við og horfði yfir Rangárvellina sá ég hversu gríðarlega fallegt er þegar snjórinn er yfir öllu, þó ég sé nú orðinn afar þreyttur á honum. Að sjá bæjarljósin, stjörnurnar og kvöldið að taka yfir, þessi daglegu átök dags og nætur getur verið stórfengleg upplifun. Hestarnir gríðarlega fjörugir og gaman að taka þá bræður saman í útreiðartúr, enda espa þeir hvorn annan og eru vel viljugir allan tímann. Þráður liggur alltaf aðeins fram með, þó maður þurfi aldrei að berjast neitt við hann. En bara við það að halda við hann þá oft tekur hann töltspor við hlið manns og það er glæsileg sjón, enda hesturinn eintakur gæðingur. Þá kreppir hann sig saman og lyftir upp yfir vinkil. Ég á engan annan svona gæðing í dag. Þó hugsanlega geti eitthvað að tryppunum orðið efnileg þegar þar að kemur. Það eru forréttindi allra hestamanna að eiga góð hross og ekki sjálfsagt að eiga svona gæðing, enda ekki á hverju strái. Alveg frábært hvað maður hressist alltaf við að fara á hestbak. Ætlaði að vinna í Kóngi. Mýldi hann og batt hann í járningaraðstöðunni, en hann var ekki fyrr orðinn fastur að hann trylltist og barðist um. Flækti sig í bandinu, sleit múlinn og á endanum varð ég að losa múlinn af honum og leysa hann úr prísundinni. Hann stóð og vissi ekki hvaðan stóð á sig veðrið, en í rólegheitunum róaði ég hann niður og teymdi inn í stíu þar sem ég kemmdi honum, klappaði og klóraði og skildi þannig í sátt við hann. Hann er hrjúfur á yfirborðinu, en með lítið hjarta. Ætla næst að prófa að binda hann utan á annan bróðirinn og teyma hann þannig um gerðið, reyna að fá hann með góðu til að læra það. Eftir það get ég farið að taka hann með í útreiðartúra, en slík “tamning” er afar góður grunnur að frekari vinnu.

Er að horfa á “Bandið hans Bubba”. Finnst sumir af þessum krökkum ekki alveg að eiga heima í þessum þætti. A.m.k. 2 þeirra eru bara alls ekki góð og árangur þeirra sífellt verri með hverjum þættinum. Ég vona að það verði tekið til í kvöld J

Læt þennan pistil duga. Óska lesendum mínum ánægjulegrar helgar.

Sjallinn – að komast til betri heilsu með hverri mínótunni sem líður!

Heyrði þetta lag áðan eftir Bubba. Textinn er í raun dálítið sorglegur og lagið gjarnan sungið við jarðarfarir, en hann er svo ákaflega fallegur að ég ákvað að leyfa ykkur að njóta hans með mér.

Kveðja

Þar sem englarnir syngja sefur þú

sefur í djúpinu væra.

Við hin sem lifum, lifum í trú

að ljósið bjarta skæra

veki þig með sól að morgni

veki þig með sól að morgni.

 

Drottinn minn faðir lífsins ljóss

lát náð þína skína svo blíða.

Minn styrkur þú ert, mín lífsins rós

tak burt minn myrka kvíða.

Þú vekur hann með sól að morgni

þú vekur hann með sól að morgni.

 

Faðir minn láttu lífsins sól

lýsa upp sorgmætt hjarta.

Hjá þér ég finn frið og skjól.

Láttu svo ljósið þitt bjarta

vekja hann með sól að morgni

vekja hann með sól að morgni.

 

Drottinn minn réttu sorgmæddri sál

svala líknarhönd.

Og slökk þú hjartans harmabál

sít sundur dauðans bönd.

Svo vaknar hann með sól að morgni

svo vaknar hann með sól að morgni.

 

Farðu í friði vinur minn kær

faðirinn mun þig geyma.

Um aldur og ævi þú verður mér nær

aldrei ég skal þér gleyma.

Svo vöknum við með sól að morgni

svo vöknum við með sól að morgni.

 

Svo vöknum við með sól að morgni

svo vöknum við með sól að morgni

                                                         Bubbi Morthens

Er að fara að heiman og verð ekki heima fyrr en á morgun. Þorrablót á Laugalandi í kvöld og verður án efa gaman.

Sjallinn - í Þorrastuði nú þegar Góan er að taka yfir!

Sælt veri fólkið.

Hef lítið bloggað í vikunni. Verið að bíða eins og þið eftir niðurstöðu Vilhjálms Þ. Vilhjálmssonar um pólitíska framtíð sína. Stöð2 fullyrti í kvöld að hann hyggðist halda áfram sem borgarfulltrúi og jafnframt taka við sem borgarstjóri í mars 2009. Ég vænti þess að fréttastofan hafi eitthvað fyrir sér í þessu. Mbl.is tekur upp eftir fréttastofu Stöðvar2.

Nú er að sjá hversu góða heimildarmenn fréttastofan hefur, en Vilhjálmur mun án efa tilkynna niðurstöðu sína innan bráðar.

Vikan hefur verið annasöm hjá mér eins og svo oft áður og ég get svosem ekkert kvartað. Samráðsnefndarfundur sveitarstjórna Rþ.ytra og Ásahrepps fór fram á mánudag og gekk afar vel. Á þriðjudag var ég mest við vinnu í Reykjavík. Á miðvikudag hittist vinnuhópur sem var skipaður til að gera frumkönnun á forsendum fyrir stofnun og rekstri verknámsdeildar fyrir grunnskólanemendur í Rþ.ytra. Kláraði vinnuhópurinn lokaskýrslu sína á fundinum og var hún svo lögð fram á fundi fræðslunefndar síðar um daginn. Alltaf gott þegar vinnuhópar ljúka störfum.

Í gær var hreppsráðsfundur kl. 13 og gekk hann afar vel. Eftir fundinn fór ég í hrossaflutninga. Flutti hryssu upp í Landsveit í tamningu. Flutti fola hingað að Kornbrekkum á hús og skilaði 2 reiðhestum sem ég var með að láni frá afa upp í Markaskarð. Í millitíðinni hittist stjórn Rangárbakka til að fara yfir skipulagsmál á Gaddstaðaflötum o.fl. vegna LM2008.

Í dag lét ég tjónaskoða bílinn hjá mér, en það kom dæld á bílhurðina og frambrettið bílstjóramegin fyrir nokkru. Sem betur fer er ég í KASKÓ því ég veit ekki hvernig þetta atvikaðist, líklega einhver gert þetta og stungið af. Bíð eftir niðurstöðu úr þessari skoðun. Fór eftir það og aðstoðaði við að færa merar- og folaldastóðið í Markaskarði og tók úr því merfolald sem ég á og það var flutt hingað að Kornbrekkum og á hús. Heitir hún Þerna, því fallega nafni. Er undan Þrumu frá Ekru og Skugga frá Strandarhjáleigu sem er 1. verðlaunahestur með 8,28 í hæfileika og 8.14 í aðaleinkunn. Hann var sýndur aðeins 4ja vetra, sem er gríðar góður árangur.  Erum við Jón Árni því komnir með 5 hross á hús. Þráð minn, Leik, Hallgrím hans Jóns Árna, Kóng minn og Þernu mína. Dýrð mín er svo í tamningu. Djásn bíður úti í stóði eftir að komast í tamningu. Ég hef þá meginstefnu að skíra hrossin mín nöfnum sem byrja á "D" og "Þ". Finnst þægilegt að hafa svona meginreglu því þá er aldrei neitt mál að muna nöfnin

Jón Brúnó og afi skutluðu Þernu hingað uppúr og ég bauð þeim í þorramat að hætti hússins á eftir. Er ég afar ánægður með þorramatinn í ár. Hann hefur heppnast alveg gríðarlega vel og er svo passlega súr.

Við Jón Árni fórum svo á eftir út í hesthús til að kanna hvernig Þerna aðlagaðist húsvistinni og hún hafði ekkert smakkað heyið á þeim 2 tímum sem hún var inni. Ég fór því að nýta mér hestasálfræðina sem ég lærði á Hvanneyri og viti menn. Á 10 mínótum var hún farin að éta af fóðurganginum og treysta mér. Innan skamms át hún hey úr hendi eins og ekkert væri. Allt án þvingunar og með fúsum og frjálsum vilja hennar Þannig á að gera þetta.

Kom mér skemmtilega á óvart í gær hversu vel mánaðartamningin á honum Kóngi í haust hefur skilað sér. Ég tók hann á skegginu og teymdi hann eins og aldrei hefði annað verið gert, en áður var hann mjög styggur. Hann var þó ekki alveg að sætta sig við að þurfa að fara út úr húsi þegar hann átti að fara á kerruna og ég stóð í miklu stappi við hann. Hestasálfræðin virkaði ekkert og á endanum hringdi ég í pabba sem kom og hjálpaði mér að reka á eftir honum, en um leið og ég setti á hann múl og taum þá gekk þetta fagmannlega eftir. Þrjóskan í mér að láta mánaðartaminn hestinn fylgja mér á skegginu gerði að verkum að ég lét múlinn og tauminn bara hanga upp á vegg á meðan ég reyndi allar aðrar kúnstir við að koma folanum á kerru. Svo auðvitað gekk ég að honum á kerrunni og teymdi hann á taumnum inn í stíu á Kornbrekkum og hafa samskiptin bara farið batnandi eftir þetta

Á morgun ætla ég á þorrablótið á Laugalandi. Hlakka til þess, enda alltaf skemmtilegt blót.

Verð að segja að mér finnast ummæli Össurar Skarphéðinssonar í garð Gísla Marteins Baldurssonar fyrir neðan virðingu manns sem gegnir stöðu ráðherra í ríkisstjórn Íslands. Össur hefur sagt að hann væri "starfsmaður á plani" í þessari ríkisstjórn og vísar þar í þáttinn Næturvaktina sem var á Stöð2. Ég held að Össur ætti að fara aftur í að vera "starfsmaður í þjálfun" því það veitir sko ekki af því að þjálfa hann aðeins upp og kynna honum almennar siðareglur manna sem fara með opinbert vald.

Læt þetta duga í bili. Hafið það gott um helgina og gangið hægt um gleðinnar dyr.

Sjallinn - ánægður með hrossaræktina þessa dagana!

Sælt veri fólkið!

Fórum í gær á þorrablót á Hellu. Maturinn var rosalega góður, skemmtiatriðin alveg frábær. Allir stóðu sig vel, en ég verð nú samt að segja, og tel mig ekki hlutdrægan, að bróðir minn stóð uppúr í þeim, gerði þetta af mikilli fagmennsku.

Ballið var þokkalegt, en ég dansaði óvenjulítið. Fannst kannski helst til og mikið spilað af kántry tónlist, en skemmti mér samt alveg ágætlega.

Búinn að vera duglegur í dag. Leyfði mér nú þann munað að sofa fram að hádegi. Hestarnir fengu því ekkert að éta fyrr en þá, en þeir þola það. Fór niður á Heiðarbrún og skilaði hrút sem ég var með að láni. Gaf fénu, hleypti ánum út í rigninguna til að fríska sig aðeins. Kláraði að setja ásetningsnúmerin í ásetningsgimbrarnar og í 1 lambhrút, en ég fékk ekki nógu mörg merki fyrst þegar ég pantaði og hafði ekki nennt að setja merkin í fyrr en nú, en þau eiga að vera komin í fyrir 1. mars skv. reglugerðinni.

Næsta vika er orðin alveg "pökkuð" hjá mér. Á morgun verð ég að vinna fram að hádegi. Þarf að fara að taka myndir og skrifa frétt á heimasíðu. Fer svo eftir hádegi að taka inn 2 hross, annað fer í tamningu en hitt hingað að Kornbrekkum. Fer svo kl. 16 á samráðsnefndarfund Rangárþings ytra og Ásahrepps.

Á þriðjudag er fundur kl. 12 í mennta- og menningarmálanefnd SASS á Selfossi. Kl. 15:30 er svo vikulegur vinnufundur hjá mér í Reykjavík.

Á miðvikudag verður fundur í fræðslunefnd Rangárþings ytra kl. 17 á Hellu. Á fimmtudag er svo fundur í hreppsráði kl. 13 á Hellu.

Ég mun því hafa nóg fyrir stafni næstu daga, svo mikið er víst.

Ég hef verið gagnrýndur oft fyrir að tjá ekki nógu oft og mikið mínar skoðanir á málefnum hér á síðunni. Nú nýlega hef ég líka verið gagnrýndur fyrir að tjá mig ekkert um "Villa málið".

Ég tek þessari gagnrýni ágætlega. Menn hafa rétt á sínum skoðunum. Ég hef valið að hafa skrif mín á síðunni blönduð. Stundum tala ég um pólitík eða málefni líðandi stundar. En oft og kannski oftast segi ég frá mínu daglega lífi og daglegu störfum. Skrifa kannski bara um nánast ekki neitt en samt eitthvað. Þó ég sé ekki alltaf að setja mínar skoðanir fram hérna á öllu mögulegu þá þýðir það ekki að ég hafi ekki skoðanir. Ég er þekktur fyrir að hafa skoðanir á öllu málum, það vita þeir sem starfa með mér. Oft hef ég sterkar skoðanir og þegar ég hef sett þær hérna fram fer oft allt á hliðina og maður þarf að vera í marga daga að eiga orðaskipti við fólk sem finnst ég óvæginn og of harður. Ég hef ekkert sérstaklega mikla ánægju af því. Það væri miklu nær fyrir mig að hætta að blogga en að standa í því að orðaskakast við fólk hérna dag frá degi og hafa jafnhliða enga ánægju af því að halda úti síðunni. Ég ætla mér að halda áfram að skrifa á þessa síðu á mínum forsendum, á minn hátt.

Varðandi Vilhjálm Þ. Vilhjálmsson, fyrrverandi borgarstjóra, þá get ég sagt að mér finnst staða hans erfið. Hann á ekkert marga kosti í stöðunni, en ég skil að hann þurfi sinn tíma til að hugsa sinn gang. Hann á jú sætið í borgarstjórninni. Það verður ekki frá honum tekið. Hann hefur þann kost að biðjast lausnar frá störfum, en það verður hann að ákveða sjálfur og það er enginn betri til þess en hann. Ég skil líka að hann vilji kannski ekki láta stjórnast af skoðanakönnunum eða þeim mikla hamagangi sem hefur verið í gangi undanfarið. Eina rétta og marktæka skoðanakönnunin er þegar kosningar fara fram.

Hamagangurinn sem hefur verið í gangi undanfarið er alveg ótrúlegur og sérstakt að fylgjast með honum. Spurningar sem blaðamenn leggja fram eru í raun þannig að það er nánast bara 1 svar til og ef þeir fá það ekki þá verða þeir gjarnan fúlir í viðtölunum. Það er sérkennileg blaðamennska. Það vekur líka athygli mína að Sf. fær enga gagnrýni á sig útaf þessu REI máli. Þeir samþykktu þetta samt. Þeir segjast ekki hafa fengið næg gögn, en samt samþykktu þeir þetta. Ef ég fæ ekki næg gögn þá samþykki ég ekki mál, slíkt er einfaldlega óábyrgt. Mér finnst líka afar einkennilegt að Kastljós, sem var með miklar og stórar ásakanir á Vilhjálm um ósannindi, skuli í tvígang (2 sinnum) hafa leiðrétt þessar staðhæfingar sínar daginn eftir. Er það ábyrg blaðamennska?

Ég veit ekki hvort VÞV segi af sér eða ekki, eða hvort hann taki við sem borgarstjóri. Ég veit bara það að í lýðræðisríki, sem Ísland er, þá hafa lýðræðislega kjörnir fulltrúar almennings sæti sitt út kjörtímabilið og það getur enginn tekið það af þeim, ekki með nokkrum hætti. Ef Geir H. Haarde bæði Vilhjálm að hætta þá breytti það engu því Vilhjálmur er kjörinn fulltrúi og hefur lagalegar skyldur sem slíkur og honum ber að sinna sínum störfum. En hann hefur líka þann kost að óska eftir því við borgarstjórn að hún veiti honum lausn frá störfum, ef hann metur það svo að hans störf þjóni ekki borgarbúum lengur. Það verður hann að gera upp við sig og er að því um þessar mundir. Meira hef ég ekki um það að segja og án efa munuð þið fá fréttir af því sem hann ákveður í gegnum fjölmiðlana eins og ég vænti að fá þegar þar að kemur.

Sjallinn - dálítið þreyttur eftir hið ágætasta þorrablót!

Vek athygli ykkar á því að ég hef sett inn myndir af mér héðan og þaðan hér til hliðar. Mun bæta við eftir því sem tilefnum og tækifærum.

Sjallinn - hinn ógurlega myndarlegi!

Ágætu tilheyrendur!

Fór í dag í fyrsta skipti í nudd til systur minnar. Var orðinn með verki hér og þar. Ég verð að segja að hún Dagbjört systir mín er alveg ótrúlega hæfileikaríkur nuddari. Gerði þetta af mikilli fagmennsku og stóð sig eins og hetja. Ég pantaði strax annan tíma.

Við Jón Árni ætlum á þorrablót á Hellu á laugardag. Hlakka ég mjög mikið til. Alltaf gaman að sjá skemmtiatriðin og eins spennandi hvaða grín verður gert að okkur hreppsnefndarmönnum

Á morgun er aukaaðalfundur Atvinnuþróunarfélags Suðurlands og einnig Samtaka sunnlenskra sveitarfélaga. Verða fundirnir haldnir á Hvolsvelli. Það verður því nóg að gera hjá mér næstu daga líkt og ævinlega.

Búið að breyta um uppsetningu á þessu blog kerfi og því ákvað ég að nútímavæðast og endurskipulagði uppsetninguna. Ég vona að hún mælist vel fyrir hjá lesendum.

Sjallinn - eins og nýr eftir nuddið!

āĚ̍牢

Annasöm vika að baki hjá mér.

Á mánudag fór ég niður á Hellu og opnaði myndlistarsýningu leikskólabarna af Trölladeild í Árhúsum. Var það ákaflega gaman. Hélt ég ræðu yfir börnunum og þau eru svo vel upp alin að þau hlustuðu af athygli

Á þriðjudag keyði ég síðdegis til Reykjavíkur til að gista þar sem ég átti að mæta á Háaleitisbrautina á miðvikudagsmorgun. Var ég mættur á Háaleitisbraut kl. 9 og átti 2 fundi þar fram að hádegi. Keyrði þá austur og átti fund á Hellu kl. 13.

Á fimmtudag var ég mættur niður á Hellu kl. 11 á fund um framtíðarhúsnæðismál leik- og grunnskóla á Hellu. Kl. 13 stýrði ég hreppsnefndarfundi í forföllum oddvita. Gekk fundurinn vel og var honum slitið kl. 17:00. Fór svo heim, enda veður og færð ekki með því skemmtilegri. Festi mig þegar ég átti 50 metra eftir heim og Jón Árni hjálpaði mér að moka frá bílnum og draga mig heim.

Í gær kom pabbi og hreinsaði heimreiðina þannig að væri fært. Ég var þó heima að vinna mestallan daginn, enda komst pabbi ekki í þetta fyrr en kl. 17. Fór niður á Hellu og verslaði lítillega inn. Gaf og mokaði í hesthúsinu og fór heim. Rafmagnið fór af í ca 30 mínótur og það voru svo miklar eldingar og þrumur að við þorðum ekki að horfa á sjónvarpið og fórum því einfaldlega að sofa kl. 22:00 í gærkvöldi.

Í dag stendur ekki margt til. Ætla niður á Hellu að kaupa miða á þorrablótið sem verður næstu helgi. Að því loknu stendur til að fara í hesthúsið og sinna verkum þar. Á eftir að járna Leik upp að aftan og væri gott að geta klárað það í dag. Í kvöld stendur svo til að njóta kvöldsins heima.

Sjallinn - always very busy!

Við erum fastir heima á Kornbrekkum í snjónum. Jeppinn kemst ekki einu sinni niður traðirnar, svo mikill er snjórinn. Í ofanálag þá hefur heitavatnsleiðslan frosið þannig að það er ekkert heitt vatn í húsinu, nema þó á ofnunum, Guði sé lof!

Á morgun kl. 10:30 á ég að mæta niður á Hellu og opna formlega myndlistarsýningu barna í Trölladeild við Leikskólann Heklukot. Hlakka ég voða mikið til þess. Gaman að verða þess heiðurs aðnjótandi. Ég þarf svo helst að fara til Reykjavíkur og vinna fram á þriðjudagskvöld, en sé til hvort ég fari á morgun eða hvort ég fari bara snemma á þriðjudag.

Sjallinn - fastur heima í snjónum!

Frostið fór niður í -19°C hérna uppi á Rangárvöllum. Þarf að segja eitthvað meira?

Sjallinn - þakklátur að enn sé einhver hiti í kroppnum!

Það fór svo að ég keyrði til Reykjavíkur í gær. Kom aðeins og seint á námskeiðið í Rúgbrauðsgerðinni. Var námskeiðið fróðlegt og gaman að fara yfir þennan málaflokk.

Eftir námskeiðið var ég í Reykjavík og gisti hjá tengdaforeldrum mínum. Í morgun fór ég að vinna á Háaleitisbrautinni og var þar til kl. 15:30.

Keyrði þá austur og er ákveðinn í að nota kvöldið í slökun.

Þarf að vinna helling um helgina, en er að vona að frostið minnki eitthvað svo ég getir riðið út inn á milli.

Læt þetta duga í bili, enda lítið að gerast í þjóðfélaginu og fátt um að tala

Sjallinn - nýkominn heim úr borgarferð!

Ég hafði að komast á hestbak í dag eins og ég ætlaði. Fór áður niður á Hellu í klippingu og keypti mér nýjan hjálm, en sá gamli var kominn til ára sinna og ekki lengur skv. stöðlum.

Ég lagði á hann Þráð gamla, sem er nú á 18. vetri sem er nú alveg sæmilega hár aldur á hesti. Ég vona þó að hann geti átt svona 5-6 góð ár í viðbót með mér. Ég reið að stóðhestastöðinni og hitti þar Sigga Óla. Drakk kaffi og hann fylgdi mér til baka að Akurhóli. Var rosa frískandi að komast á bak. Mokaði svo út hesthúsið eftir ferðina og gaf.

Fórum áðan niður á Hellu í félagsvist. Gekk spilamennskan ágætlega. Ég reyndar náði ekki góðu skori, en Jón Árni varð efstur í kvöld í karlaflokki sem var mjög gaman. Á ferðinni heim var skafið í traðirnar heim frá Gunnarsholti, 1000 metra. Við hjökkuðumst í gegnum þær upp að beygju, fyrstu 500 metrana, en þar festum við bílinn og ætluðum báðir að labba heim, en Jón Árni ákvað þegar við vorum á móts við hesthúsið að sækja skóflu og reyna að ná bílnum upp. Hann er að því núna á meðan ég sit kaldur og þreyttur eftir labbið í rokinu.

Ég þarf að fara eldsnemma í fyrramálið til Reykjavíkur. Þarf að vinna og fara á námskeið. Gisti svo í bænum næstu nótt og fer á námskeið á föstudagsmorgun og svo að vinna á Háaleitisbrautinni eftir hádegi. Við erum svo að velta fyrir okkur að fara inn í Fljótshlíð á föstudagskvöld að spila félagsvist.

Læt þetta duga í bili, langar að fara undir sæng og ná hita í kroppinn.

Sjallinn - orðinn alveg hrikalega þreyttur á þessum skafrenningi!